යසරංසි

තේ වෙනුවට coke

සවස කාර්යාලීය කටයුතු කලමනා අහවර වී, තෙහෙට්ටුවෙන් යුතුව තරුණ යුවල නිවසට පැමිණෙන්නේ සිය විඩාව නිවා ගැනීමේ මූලික පරමාර්ථය පෙරදැරිව වග පෙනී යයි. නිවසට ගොඩවූ විගස තරුණ බිරිය කෝප්ප දෙක පසෙකින් තබා වතුර කේතලයක් ලිප මත තබයි.

තරුණ සැමියා පසෙකින් තබන ලද වාහනයේ යතුර, සුඛෝපභෝගී ගෘහ භාණ්ඩ ඔස්සේ අනියමින් සන්නිවේදනය කරනුයේ මොවුන් විධායක පංතියේ රැකියා කරන, ධනවත් යුවලක් බවයි. එමෙන් ම සාමාන්‍ය පවුලක මෙන් නොව, මෙහි ඇත්තේ නවීන පන්නයේ උඳුනකි. එය සාමාන්‍ය ගෑස් ලිපකට වඩා මිල අධික වූවකි.

එමෙන් ම මෙහි සැමියාගේ ඇඳුම් පැළඳුම් තුළින් ද දිස් වනුයේ ඔහු ඉහළ පැලැන්තියේ රැුකියාවක් කරන මහත්මයෙකු බවයි. බිරිය ඇඳ ඇති ඇඳුම් කාන්තාවන් කාර්යාලීය කටයුතු සඳහා අඳිනු ලබන නවීන මෝස්තරයෙන් මසන ලද ඇඳුමකි. එතුළින් දිස්වනුයේ ද ඇය කිසියම් පෞද්ගලික අංශයක රාජකාරී කරන්නියක බවයි.

තවද බිරියගේ රතු පැහැති හැට්ටය තුළින් කෝක-කෝලා පිළිබඳ සන්නිවේදනය කෙරෙන අතර ම පසුකාලය තුළ ද රතු මිශ‍්‍රිත වර්ණ භාවිතයක් හඳුනා ගත හැකි ය.

මෙහිදී බිරිය තේ පානයක් සකස් කිරීමට සූදානම් වේ. වතුර කේතලයේ වතුර උණුසුම් වූ බවට නිකුත් කෙරෙන හඬ සවනට වැකුණු සැමියාට සිහිවන්නේ වෙනකකි. ඔහු සිය බිරිය විඩාපත්ව තේ පිළියෙල කරන්නට සැරසෙනු දැක වහා ගොස් ශීතකරණය තුළ වූ කෝක-කෝලා බෝතල් දෙකක් ඉන් ඉවතට ගනී. පසුව තේ කෝප්ප යුගල පසෙකට කරයි. එය ප‍්‍රබල සංඥාවකි. තවද කෝප්පයක් ගෙන ඊට වඩා කෝක-කෝලා පානය වඩා යහපත් එකක් බව පෙන්වා දෙයි.

මේ අවස්ථාව මෙම දැන්වීමේ ප‍්‍රබලත ම අවස්ථාව ලෙස පැවසීමේ වරදක් නැත. සාමාන්‍යයෙන් කවරවුව රටක, නගරයක, ගමක අයෙක් විඩාව, තෙහෙට්ටුව මඟහරවා ගැනීමට උණුසුම් තේ, කෝපි හෝ චොක්ලට් වැනි උත්තේජක පානයන් ලබා ගනී.

මෙහිදී පෙන්වා දෙනුයේ එවන් ප‍්‍රබෝධමත්, උත්තේජනයකට කදිම විසඳුම වනුයේ තේ පානය නොව, කෝක-කෝලා පානය බවයි.

මෙහිදී තරුණ සැමියාගේ කෙළිලොල් බව, ආකර්ෂණීය පෙනුම, ජවය පිරුණු හැසිරීම් රටා ආදිය යොදා ගෙන ඇති අතර මේවා තරුණ ප‍්‍රජාව ආකර්ෂණය කරගැනීමට සමත් ය. බිරිය ද ඔහුගේ හැසිරීමෙන් වික්ෂිප්තව සිටිනු පෙනේ. තාරුණ්‍ය තුළ, අලූත සිදුවූ විවාහය තුළ පවතින මිහිර, සැහැල්ලූව, සතුට, විනෝදය වැනි කාරණා වඩා ආකර්ෂණීය අන්දමින් මෙතුළ හුවා දක්වමින් මනෝමය වශයෙන් ග‍්‍රාහකයා තුළ පවතින සිහින ලොවකට ආමත‍්‍රණය කරනු ලබයි.

ධනවත් ලෙස, යානවාහන සහිතව, නවීන ගෘහභාණ්ඩ, නවීන විදුලි උපකරණ පිරුණු සුඛෝපබෝගී නිවසක තම සැමියා හෝ බිරිය සමඟ සතුටින් වෙසෙන්නට තාරුණ්‍ය තුළ ඇත්තේ අමරණීය සිහිනයකි. කෝක-කෝලා පානය එම සිහිනය යථාවක් කරවන බවට ග‍්‍රාහකයා වෙත සන්නිවේදනය කෙරේ.

ලොව වැඩි ම පිරිසකගේ පි‍්‍රයත ම පානය බවට පත්ව ඇති ‘‘තේ’ මුලින් ම සොයා ගෙන ඇත්තේ චීනය විසිනි. දහවෙනි සියවසේදී පමණ ජිවත් වූ චීන අධිරාජ්‍යයෙකු වූ හුයිසුන් (1100-1126)  සැබෑ ම තේ රසවතෙක් ලෙස සැලකේ. කෝපි පානයට ද එවන් ම ඉතිහාසයක් ඇත.

එමෙන් ම චොක්ලට් සහිත උණුසුම් පානයක් ද මායාවරුන් විසින් මීට වසර දෙදෙහසකට පමණ පෙර නිර්මාණය කළ බවත්, අද වන විට මෙම පානය ද ලොව පුරා අතිශය ජනපි‍්‍රය වූ පානයක් වන බවත් නොරහසකි.

මෙලෙස මානව වංශකතාවේ අක්මුල් සමඟ ලේ නෑකම් පවත්වනු ලබන එවන් උත්තේජක පානයන් ඉවතලමින් කෝක-කෝලා හි ආගමනය, අද වන විට ඔවුන්ගේ අභිමතය පරිදි ම සමාජගතවී ඇත්තේ මෙම දැන්වීම් ඔස්සේ යොදා ගෙන ඇති ජනපි‍්‍රය සංස්කෘතිකාංග නිසාවෙනි. නිරන්තරයෙන් ප‍්‍රශ්නවල පීඩනයට පත්ව සිටින මිනිසුන්ට මෙම දැන්වීම් තුළින් පෙන්වන අධියථාර්ථය ඔස්සේ මැවෙන මනෝරාජිකය මිහිරි ය. එමෙන් ම දැන්වීමේ, පි‍්‍රයාව කෝක-කෝලා පානය කරන්න ඉඩ දෙන්න, යනුවෙන් පවසනුයේ සිත්ගන්නා සුළු මිහිරි සංගීතමය ස්වරයකිනි. එය ද ග‍්‍රාහක මනස කෝක-කෝලා මිළදී ගැනීමට පොළඹවා ලන්නකි. මෙතෙක් සාම්ප‍්‍රදායිකව, ගතානුගතික ලෙස පානය කළ තේ, කෝපි පානයත් වෙනුවට අනවශ්‍ය පාරිභෝජනයක්, අත්‍යවශ්‍ය එකක් ලෙසින් ග‍්‍රාහක මනස තුළ ගොඩනඟන්නට මෙම දැන්වීමේ යොදා ගෙන තිබෙන ජනපි‍්‍රය සංස්කෘතික ලක්ෂණ ප‍්‍රබල හේතුවක් බවට පත්ව ඇතැයි පෙන්වා දිය හැකි ය.

වීඩියෝව නැරඹීම සඳහා පිවිසෙන්න...

https://www.youtube.com/watch?v=rc4OPxPV9R4